Bíómyndaleikur löggunnar

Það er eflaust rétt að sumir ungir piltar sem nýkomnir eru með bílpróf halda að akstur sé eins og tölvuleikur og komi eitthvað fyrir megi bara rístarta leiknum

En grun hef ég um að sumir lögreglumenn haldi stundum að lögreglustarfið sé spennandi bíómynd og að henni lokinni taki við annar veruleiki.

Þessi eltingarleikur lögreglunnar á eftir ökuföntum er háskaleikur og þarf að fara að taka á og banna.  Fyrst hægt er að hafa upp á mönnum sem virða ekki ökuhraða með földum myndavélum þá á að láta það duga.  17 ára piltar sem vísvitandi hafa gefið í á einhverjum stað sem þeir telja vera alveg öruggan og uppgötva að lögreglan hefur staðið þá að verki  eiga það til að taka barnalegar og rangar ákvarðanir, -við styngum lögregluna af.  Sá sem tekur svona ákvörðun er ekki í jafnvægi, hefur ekki skýra hugsun og í raun hræddur -og hefur ekki vald á ökutækinu.  Sé lögreglunni ant um að viðkomandi fari sér og öðrum ekki að voða þá á hún ekki að elta viðkomandi með blikkandi ljósum og sírenuvæli.  Það eru til mörg önnur ráð til að ná í viðkomandi ökumann og taka á málinu.  Stöðvum háskaleik lögreglunnar.

Ökumanni veitt eftirför um Kópavog

Athugasemdir

[Hreiðar Eiríksson, 6.8.2007 kl. 17:38]

Þú nefnir að það séu mörg önnur úrræði til að taka á málinu.  Ég er viss um að almenningur og lögregla yrðu þér þakklát ef þú upplýstir um þessi ráð.  Svo virðist sem gervöll lögreglan, bæði hér og erlendis, hafi verið þjálfuð og menntuð án þess að hafa aðgang að þessari þekkingu sem einhvern veginn virðist hafa ratað á þitt borð.

Sjálfur þekki ég ekki mörg úrræði í þessu máli en starfaði þó við löggæslu í 20 ár.  Eftirfarir á ofsahraða eru vissulega neyðarúrræði en við tiltekin skilyrði verður ekki hjá þeim komist.

[Danni (IP-tala skráð) 6.8.2007 kl. 21:21]

Góða kvöldið.

Mér þætti eðlilegt að ljósmynd af bílnum myndi nægja til sakfellingar eiganda bílsins eða þess sem hann vísar á sem ökumann.

Mér þykir þetta geðveiki - þessir eltingaleikir löggunnar. Bara til að stoppa viðkomandi og láta hann fá gíróseðilinn?

Þess utan eru flestir lögreglumenn ekki með nokkurs konar þekkingu á svona hraðakstri sjálfir - frekar en brotamennirnir sem þeir elta - og bílafloti lögreglunnar ekki gerður sértaklega til þess að liggja vel á vegi! Það er nú ekki sjaldan sem löggan sjálf hefur ratað í ógöngur - enda engin furða. Hver gæti keyrt t.d svarta maríu hratt án þess að valda sjálfum sér og öllum vegfarndum stórkostlegri hættu!

Taka mynd af hraðakstrinum - með radartölunni á - og senda svo eiganda bílsins sms með staðsetningu fyrirtökunnar og gefa honum þannig færi á að hugsa sinn gang þar sem hann bíður út í runna - og koma sjálfur á stöðuna og taka út blúsinn.

Enginn stingur neinn af eða þarf að keyra umfram getu í stundarbrjálæði - haldandi að hann sé að spara sér pening.

DS

[Haukur Þór (IP-tala skráð) 6.8.2007 kl. 22:24]

Heyrðu kúturinn minn...held að þú sért nú ekki alveg í lagi eða hvað? Ætla nú að minna þig á(og þú ættir þá að muna eftir því þar sem þú segist hafa starfað við löggæslu í 20 ár að eigin sögn), þegar lögreglan frá höfuðborginni og selfossi sameinuðust fyrir mörgum árum að elta einhvern truflaðan einstakling frá Rvk áleiðis til Selfoss. Nema hvað að viðkomandi náði ekki nema að Hafnarfjalli þar sem hann fer fram úr enn einum bílnum og lendir framan á gömlum hjónum með svartklæddar hetjur í baksýnisspeglinum alla leið til enda. Og þegar ég segi enda, þá meina ég enda. Viðkomandi lést ásamt það dó annað hjónanna, man ekki hvort þeirra. Mitt persónulega álit er það að lögreglan hafi átt sína sök í þessu máli! Held að ég sé ekki að ljúga þegar ég segi að slíkar eftirfarir séu ekki stundaðar í dag hjá árborgar lögreglunni. Enda kemur fram í fréttinni um slysið á laugarvatnsveg að lögreglan hafi misst sjónar af viðkomandi sem bendir til þess að löggan hafi ekki barist við það að hanga í stuðaranum á við komandi. Annað sem ég vil benda þér á, er það að lögreglan er oft á tíðum ekkert betri ökumenn en þessi meðal jón í umferðinni. Sem dæmi skal ég nefna þegar lögreglubíllinn valt á leið í útkall við álverið í Straumsvík. Forgangsakstur með ljósum og vítaverðum akstri sem endaði með veltu í beygju þar sem malbikið var þurrt, gott útsýni, bjart og allmennt góð skilyrði. Og út af hverju? Út af því að það voru 2 menn að slást þarna einhverstaðar...Hvað er málið??? Var nú sjálfur stoppaður á hellisheiði um nótt fyrir stuttu síðan. Var lögreglan að láta mig blása og athuga ökuskírteinið mitt. Að sjálfsögu var ég edrú:) En það sem ég tók eftir var að konan í farþegasætinu var í sífellu að segja bílstjóranum til. Það kom nú seinna í ljós að viðkomandi var nemi. Hefur þessi nemi einhverja reynslu í því að aka á eftir ökumanni sem ekur á 150+ km. á klukkustund? Það held ég ekki. Einnig vil ég nefna að félagi minn vann á þjónustuverkstæðinu hjá lögreglunni uppá höfða og ég get fullyrt að það eru jafnmikið af klaufum innan lögreglunnar og annarstaðar! Málið er bara það að lögreglan hefur enga sérstaka þjálfun í svona eltingaleik svo vel sé og má sjálfsagt kenna aðstöðuleysi að miklu leyti um. Lögreglan á ekki að hanga í svona vitleysingjum! Annað er einfaldlega stórfellt dómgreindarleysi!!! Það eru aðrar leiðir en bíómynda aðferðirnar! Kannski vegatálmar? En ég ætla setja hér einn link á íslenskt mynband sem er tekið upp í lögreglubíl þar sem stuðari er við stuðara. Og takið eftir einu...löggan reynir að snúa bílnum sem hún er að elta inní íbúðargötu þar sem bíllinn hefði farið niður brekku og hugsanlega einn af þessum timburhjöllum þarna. Sem betur fer tókst henni það ekki. Vil ekki hugsa þá hugsun til enda!

http://youtube.com/watch?v=BZRnzNJcCQs

Hreiðar. ég held að þú ættir að hugsa þinn gang og opna augun fyrir því að það sem áður var talið virka, virkar ekki endilega í dag.
Virðingafyllst
Haukur Þór

[Haukur Þór (IP-tala skráð) 6.8.2007 kl. 22:30]

Vil taka það fram að það sem ég skrifaði áðan er beint til Hreiðars sem skrifaði fyrstu athugasemdina!

Takk.

[Kjartan Eggertsson, 6.8.2007 kl. 22:44]

Sælir allir saman og takk fyrir að nenna að gera athugasemdir við þessi skrif.

Hreiðar!  Það að ná að elta uppi lögbrjót sem virðir ekki hámarkshraða er bara hálft verk.  Framhaldsverkefnið er að vinna í málum þess manns þannig að ekki komi til þessa hraðaksturs aftur.  Að sjálf sögðu er hægt að taka á öllum málum.  En það kostar tíma og orku og vilja og trú og vissu um að menn ráði við að verkið.  Hafi slikt verkefni ekki verið á verkefnaskrá lögreglunnar hingað til þá hlýtur það að vera eitt af verkefnum hennar í framtíðinni. 

[Kolbrún Stefánsdóttir, 8.8.2007 kl. 20:57]

Þetta er mikið tilfinningamál það er auðséð á þessum athugasemdum sem hér eru. Ég er því miður alveg ósammála þér félagi Kjartan og tel að við verðum að efla virðingu lögreglunnar þannig að "ungir " ökumenn viti að það er ekki lausn að stinga lögregluna af. Þeir verða að vera vissir um að það sé ekki  hægt. E.t.v. þarf að þjálfa lögreglumenn í hraðakstri og að bregðast við þessum aðstæðum en ég myndi treysta mér í þennan hraða  ef ég þyrfti ekki að óttast að löggan tæki mig :) Löggæslan á aldrei að þurfa að gefast upp fyrir lögbrjótum hvort sem er í umferðinni eða annarsstaðar. Það getur kostað mörg mannslíf að slá af þó lögreglan hafi metið það svo í síðasta tilfellinu á  Laugavatnsvegi, þar sem lítil umferð var en endaði samt á ömurlegan hátt. Varðandi myndir oþh þá er þetta ekki bara spurning um að innheimta og refsa heldur að gæta lag og reglna, alltaf á sem farsælastan máta. Ég stend með löggunni þó hún hafi stundum tekið mig fyrir of hraðan akstur en  það er bara fyrir það að hámarkshraði er of lár að mínu mati. Danni það geta allir lent í óhöppum jafnvel við sjálf svona góðir bílstjórar...

[Georg Eiður Arnarson, 8.8.2007 kl. 23:04]

Sammála Kolbrúnu, kv.

[Kjartan Eggertsson, 9.8.2007 kl. 16:52]

Sæl Kolbrún.

Það er ekkert samasemmerki á milli virðingarinnar við lögregluna og vitneskjunnar um að það sé ekki lausn að stinga lögregluna af.  Þeir sem reyna það eru ekki með fullu viti þá stundina sem þeir aka eins og brjálæðingar og stefna lífi annarra í hættu.  Sama gildir um lögregluna, -það er ekkert annað en heimska að ætla að elta uppi ökuníðing sem hefur misst vitglóruna við aksturinn af hverju sem það stafar.

Ég ætla rétt að vona að ekki verði tekinn upp sérstök þjálfun fyrir lögreglumenn í hraðakstri. 

Ég hef enga sérstaka trú á refsingum sem fólgnar eru í fjárútlátum fyrir þann sem brýtur lög og ég átti ekki við að myndavélar gætu gegnt því hlutverki að hægt væri að senda brotlegum rukkun á þægilegan hátt.  Sá sem staðinn er að verki við að brjóta lög þarf aðstoð.  Hann þarf aðstoð lögreglunnar og annars fólks sem getur komið viðkomandi á rétta braut.  Það er ekkert gagn að því að elta uppi ökunýðing ef það kemur ekki í veg fyrir að hann endurtaki brotið.

Lögreglan

[Kjartan Eggertsson, 9.8.2007 kl. 16:58]

Lögreglan er í þjónustu okkar.  Við eigum hvorki að þurfa að óttast samskipti við hana eða aksturslag hennar á götum og vegum landsins. 

[Kolbrún Stefánsdóttir, 11.8.2007 kl. 20:50]

Sæll Kjartan. Við þurfum ekkert að karpa um þetta. Ef einhver hefur " misst vitglóruna við aksturinn" á að mínu mati að stoppa hann strax og ég held að hann endurtaki ekki brotið frekar ef hann er eltur uppi , nema síður væri. Það er ekki endalaust hægt að aðstoða fullorðið fólk  ( eða fólk orðið fullt). Það ber líka ábyrgð.