Þetta mætti Alþingi gera áður en gengið er til viðræðna við ESB:

Nú, þegar búið er að samþykkja að óska eftir viðræðum um aðild og inngöngu í ESB er nauðsynlegt að átta sig á því hvað það er í landsins gæðum sem við viljum hafa fulla stjórn á og yfirráð,  -og í hvaða tilgangi. 

Alþingi ætti að byrjað á því að setja nokkur lagaákvæði til að vilji og hagsmunir þjóðarinnar séu öðrum þjóðum ljósir og á hreinu hvað varðar nýtingu og yfirráð á auðlindum landsins:

1. Breyta lögum um fiskveiðistjórnunina þannig að sjávarútvegsfyrirtæki fái tímabundinn veiðirétt.  Hann má vera til 1 árs, 3 ára og 5 ára.   Allir rétthafar skulu eiga lögheimili á Íslandi, róa frá íslenskri höfn og landa aflanum í íslenskri höfn og greiða skatta og skyldur hér á landi.
2. Setja þarf lög um að eign á landi og leiga á landi sé háð því að land sé nýtt til fyrirfram skilgreindra hluta, þannig að nýting lands sé til hagsbóta fyrir þjóðina.  Landeigandi hafi forgangsrétt á nýtingu lands, en að öðrum kosti geti yfirvöld ráðstafað réttindunum. Landréttindi eru: Notkun ræktaðra túna, haga, afréttar, skipulagðra byggingareita og hvers konar hlunninda; svo sem eins og vatns til einkanota, virkjun vatnsfalla til einkanota, notkun jarðhita til einkanota og námugröfts til einkanota.
3. Setja þarf lög um að vatn, vatnsföll, jarðhiti, námur og afl vinds og sjávar séu eign þjóðarinnar og skulu nýtt í þágu hennar. Undaskilinn er einkaafnotaréttur ábúenda jarða, samanber upptalninguna hér á undan í lið númer 2.

Þegar þessu er lokið getum við gengið til aðildarviðræðna og í framhaldi af því kosið um inngöngu í Efnahagsbandalag Evrópu og væntanlega tekið upp evru í beinu framhaldi af samþykktri inngöngu.